الكيكة الروسية

كيكة العسل اي الكيكة الروسية

الطريقة
نص كوب زبدة في حرارة الغرفة علي حمام مائي لين ادوب الزبدة بعدين انضيف كوب سكر عادي وانحرك بالملعقة ثم نضيف 2او 3
ملاعق عسل وانحرك وبعدين انضيف
بيضاتان وفانيليا وانحرك و انضيف ملعقة كبيرة بيكن بودر وفي الي ايدير في بيكربونات الصوديوم و ملعقة صغيرة خل. ونص كوب دقيق وانحرك لين يبدا الخليط هافت زي خليط الكيكة وبعدين انضيف نص كوب دقيق تاني وانحرك لفترة وبعدين انزله من الحمام المائي وانضيف كوب ونص دقيق ونخلط خلاص هكي كملنا العجينة تمام.

توا انجو باش انشكلوها اول حاجة انجيبوا ورقة الزبدة ونرسمو عليها دائرة بالبيرو علي حسب الحجم الي تبيه. وبعدين ناخد من العجينة مقدار ملعقتين وانحضها في وسط الدائرة وانبلل ايدي بشوية زيت ونبدا نفرد في العجينة لن توصل لحواشي الدائرة اع اتغطي الدائرة واتكون رقيقة وبعدين انحطها في طاجين وللفرن علي درجة 180

ومتقعدش هلبة اي بسرعة ما اطيب. وهكدا لن تكمل العجينة واني دارتلي 6 اقراص والسابعة خليتها تتحمر شوية وانحضها في ست البيت تبدا زي البسكويت المطحون باش انزين بيها.

انجو للحشوة اني درت كوبان كريمة سائلة و ملعقتان اكبار عسل و نص كوب سكر مرحي وضرف شانتي وظربيهم لن جمدت وبعدين بديت انستف في القرص وبعدين الكريمة وزدت فستق مجروش انتي ممكن اديري جوز 
او لوز حسب الرغبة وصبيت شوية كراميل الجاهز وهكذا لن تكمل الكمية وبعدين غلفتها بباقي الكريمة ورشيت البسكويت المطحون والتزيين علي حسب الرغبة